گجر بکروا ل لوک بھیڈ بکری رکھے ۔مالی طور پو یہ لوک اسے مال پو انحصار کرے کیوں جے یہ لوک کوی ہور کم کرݩ کو تجربو  نیہہ رکھتا۔ ان کو  مال مویشی  ان کی آمدݩ کو ذریعو  ہے ۔اپنا مال کی چنگی  پرورش واسطے  یہ  لوک گرمیاں  ما پاکستان کا شمالی علاقہ جات  ما  چل   جاتے  تے  سردیاں  ما  یہ  لوک  پنجاب تے  سرحد   کا  ایسا  علاقاں  ما  رہ  جت  مچ  جنگلات  وھے۔یہ لوک خاص طور پو قرباݩی کی عید کا موقع پو اپݩو ما ل بیچے تےاس تے علاوہ سال کا دوجا مہینا  ما  بھی ضرورت کے مطابق یہ لوک اپنو ما ل  بیچے  تے ملک ما  گوشت کی کمی نا  پوری کرے۔جہڑا بکروال لوک مال مویشی بیچ کے ڈھاکاں تے مالیاں پو آݩ جاݩ چھوڑ دِتو  ویہ محنت مزدوری بھی کرے۔ کجھ بکروال لوک پڑھ لکھ کے سرکاری تے پراییویٹ ادارہ ما ملازمت بھی کرے مگر یہ لوگ تعداد ما کم ہے زیادہ لوک مال مویشیاں کو ہی کم کرے۔ یاہ گل مچ دلچسپ ہےجے مچ بکروال لوک جہڑا اپݩو پیشو چھوڑ کے ہور کم کاج کرے تھا انھ نے وہ کم چھوڑ کے بھی بھیڈ بکریاں کو کم شرع کر لیو جِس تے یاہ گل ثابت وھے کہ انھ لوکاں کو ہچھو گزارو مال مویشی رکھݩ ما ہی ہے۔