مادری زبان ما تعلیم کی مچ اہمیت ہے اسی وجہ نال اقوام متحدہ کا ادارہ نے مادری زبان ما تعلیم دیݩ پو زور دتو ہے۔ پاکستان کا گجر بکروالاں واسطے موبایل سکول بھی چل رہیا ہیں جِہڑا مادری زبان ما بکروال قبیلہ کا بچاں نا تعلیم دیں۔ موبایل سکول سسٹم دنیا کو منفرد سلسلو ہے جہڑو گجر بکروال برادری نا انھ کے ڈیرا ما تعلیم دیے۔ یاہ گل مچ ہی ہچھی ہے جے خاص کر بیٹکی پردہ ما رہ کے اپݩا ڈیرہ ما بنیادی تعلیم حاصل کر سکے۔ برصغير کی تقسیم تے کاہڈ یہ لوک جس وقت پاکستان ما ہجرت کر کے آیا، اس وقت تے لے کے اج تک اِنھ لوکاں وسطے تعلیم کی سہولت نیہہ تھی کیوں جے یہ لوک پورو سال سفر ما رہ تھا تے اپݩا بچاٞں نا سکول نیہہ چلا سکے تھا۔ اس تمام صورتحال نا مدنظر رکھ کے بکروال موبایل سکول سسٹم کو آغاز کیو۔ اس سسٹم کو بانی ایک امریکی ماہر لسانیات ہیں جن کو ناں وین لوسی ہے۔یہ امریکہ تے گوجری زبان ما تحقیق کرݩ وسطے پاکستان آیا۔ جس وقت انھ نے بکروالاں کی تعلیمی صورت حال دیکھی تے انھ نے سکولاں کو یوہ سلسلو شروع کیو تے انھ وسطے بنیادی نصاب بھی گوجری زبان تیار کیو۔انھ سکولاں ما بنیادی تعلیم گوجری زبان ما دتی جاۓ۔ گرمیاں ما یہ لوک جس وقت پاکستان کا شمالی علاقہ ما مال مویشی لے کے چلے تے سکول انھ کے نال چلے تے سردیاں ما جس وقت یہ لوک واپس پاکستان کا صوبہ پنجاب تے خیبر پختون خواہ ما رہ تے یہ سکول انھ کے نال وھے۔
یہ سکول نرسری جماعت تے لے کے پنجویں جماعت تک ہے۔ انھ ما پڑھایو جاݩ ہالو بنیادی نصاب مادری زبان گوجری ما ہے۔ اس طرحیا بچا آسانی نال حروف کی پہچاݩ کر سکے۔ پریپ تے لے کے پنجویں تک سرکاری سکولاں ما رايج نصاب پڑھایو جاۓ تے نال نال گوجری کہاݩیاں کی کتاب بھی پڑھا یی جاۓ۔ اس وقت پاکستان کا صوبہ پنجاب تے خیبر پختون خوا کا مختلف علاقہ ما تقریبا 25 سکول چل رہیا ہیں جن ما تقریبا 400 کے قریب گجر بکروالاں کا بچہ تے بیٹکی تعلیم حاصل کریں۔ بالغ مرد تے عورت بھی بڑی شونق نال بنیادی تعلیم حاصل کرے۔
